សាលាអន្តរជាតិ អេស អាយ អេស (SIS) បានប្រារព្ធកម្មវិធីសប្បុរសធម៌ ជារៀងរាល់ឆ្នាំ ហើយនៅថ្ងៃទី១១ ខែមករា ឆ្នាំ២០២០ នេះកម្មវិធីសប្បុរសធម៌ ដែលត្រូវបានធ្វើឡើងជាថ្មី និងបានប្រមូលថវិកា បានជាង១ម៉ឺនដុល្លារសម្រាប់ ជួយមន្ទីរពេទ្រគន្ធបុប្ផា។ លោកស្រី បណ្ឌិតងឿន ផល្លីនពោធីតា នាយិកាសាលាអន្តរជាតិ អេស អាយ អេស (SIS ) បានមានប្រសាសន៍ថា នាងខ្ញុំមានមោទនភាពជាខ្លាំង ចំពោះប្អូនៗយុវសិស្ស ដែលបានចូលរួម និងការលៈបង់ទាំងកម្លាំងកាយ ពេលវេលា និងមួយចំនួនចំណាយទាំងថវិកា និងសម្ភារៈផ្ទាល់ខ្លួនថែមទៀត ពិតជាគួរអោយសរសើរ និងស្ញប់ស្ញែង។

លោកស្រីបន្តថា ជាការពិតណាស់ លើសពីការប្រមូលថវិកា ជួយមន្ទីរពេទ្រគន្ធបុប្ផា កម្មវិធីយើងបានបណ្តុះនូវគំនិតក្នុង​ការធ្វើទានដល់ប្អូនៗយុវវ័យ ដែលជាទំពាំងស្នងឬស្សី អោយចេះរួបរួមសាមគ្គីគ្នា ចេះស្រឡាញ់ ចេះជួយ និងចេះលះបង់ ”ការស្រឡាញ់ គឺជាការចែករំលែក” ”ការស្រឡាញ់ គឺជាការលះបង់”។​ ​ជាពិសេសយើង​បានផ្តល់ឪកាសដល់ប្អូនៗ ដែលមានទេពកោសល្យ​សិល្បះ និងសមត្ថភាពល្អ បានសម្តែងបង្ហាញ ដែលនេះជាការធ្វើល្អ ក្នុងសង្គមមួយដែលមិនអាច​កាត់ថ្លៃ​បាន។​ អរគុណចំពោះការចូលរួមក្នុងការធ្វើប្រយោជន៏ ដ៏ធំដល់ប្រទេសកម្ពុជា នាងខ្ញុំសង្ឃឹមថា ក្នុងចិត្តអ្នកទាំងអស់គ្នា នឹងដិតជាប់នូវស្នាមញញឹម របស់កុមាររាប់លាននាក់ដែលយើងបានជួយ៕